AVEVA; SINA UGOMVI NA KABURU

Rais wa Simba, Evans Aveva

Na Bertha Lumala, Dar es Salaam 

Rais wa Simba SC, Evans Aveva amesema kuwa ana maelewano mazuri na Makamu wa Rais wa klabu hiyo, Geoffrey Nyange ‘Kaburu’ na kwamba hana ugomvi wowote na kiongozi huyo wa wanamsimbazi.

Akizungumza katika mkutano mkuu wa wanachama wa Simba SC uliofanyika Ukumbi wa Maofisa wa Polisi Oysterbay jijini hapa leo, Aveva amesema kuna taarifa zimekuwa zikielezwa katika mitandao mbalimbali ya kijamii kwamba hana uhusiano mzuri na Kaburu, jambo ambalo amelikanusha vikali.

“Tumekuwa na matokeo mabovu na mwenendo wa kusuasua katika timu yetu. Ni matokeo mabaya ikilinganishwa na historia na jina la Simba Sports Club.

“Matokeo hayo yamekuwa yakiibua maswali mengi huku baadhi ya mitandao ya kijamii ikieleza kuwa mimi (Aveva) sina uhusiano mzuri na Kaburu.

“Ukweli ni kwamba mimi na Kaburu tunafanya kazi kwa ushirikiano mkubwa, na si Kaburu tu, bali viongozi wote wa Simba SC. Hizi taarifa kwamba ni ugomvi na Kaburu si kweli,” amesema Kaburu.

Rais huyo pia ameeleza masuala mbalimbali yanayoihusu klabu hiyo ikiwa ni pamoja na ujenzi wa uwanja, kuongeza idadi ya wanachama kwa kuleta mtambo maalum wa klabu kwa ajili ya kuchapisha kadi mpya za wanachama badala ya kuchapisha kwa watu binafsi ili kupunguza gharama.

Ukawa hawarudishwi Simba

Aveva amesema kuwa kamwe wanachama 72 waliofutiwa uanachama wa Simba SC hawatarudishwa kwa sababu walifukuzwa kwa mujibu wa katiba ya klabu hiyo ya Msimbazi jijini hapa.

Aveva amesema kuwarudisha kinyemela wanachama hao ni kukiuka misingi ya katiba kwani misingi ya katiba hiyo ilifuatwa wakati wa kuwafutia uanachama.