NDOA YAMBADILI EMMANUEL OKWI KAMBINI SIMBA

Mshambuliaji nyota wa Simba, raia wa Uganda, Emmanuel Okwi, anadaiwa kubadili mfumo wake wa maisha ndani ya klabu hiyo tangu aliporejea kutoka katika likizo ya ndoa aliyokuwa amepewa na uongozi wa timu hiyo baada ya kuoa.

Okwi ambaye hapo awali alikuwa akidaiwa kuwa na tabia ya usumbufu, hivi sasa ni mtoto mwema kutokana na kuwa msitari wa mbele kuzingatia kila jambo analoagizwa kufanya na kocha mkuu wa timu hiyo, Mserbia, Goran Kopunovic.

Hali hiyo, Pia imewafanya viongozi wa timu hiyo kutoyaamini macho yao kwani walizoea kumwona akiwa tofauti kabisa na alivyo hivi sasa ikiwa ni baada ya kuoa.

Kopunovic ambaye amejiunga na Simba akichukua mikoba ya Mzambia, Patrick Phiri, alisema kuwa kila siku zinavyozidi kusonga mbele ndivyo Okwi anavyozidi kubadilika kwani tabia yake ya sasa ni ya kuigwa na wachezaji wote katika kikosi hicho.

“Hakika najivunia kuwa na mchezaji kama Okwi katika kikosi changu kwani ni mfano wa kuigwa na wenzake kuanzia ndani na nje ya uwanja, japokuwa hapo awali nilisikia kuwa ni msumbufu lakini binafsi usumbufu huo sijauona.

“Hata hivyo nimekuwa nikisikia baadhi ya wachezaji wenzake wakimtania kuwa tangu alipooa amebadilika sana, labda hiyo ndiyo sababu,” alisema Kopunovic.

Okwi amejiunga na Simba msimu huu akitokea Yanga ambako alikuwa akisumbuana vilivyo na viongozi wa klabu hiyo na mpaka sasa bado ana kesi nao baada ya kudai kuwa wanataka kwenda kumshtaki kwa Shirikisho la Soka la Kimataifa (Fifa) kutokana na kukiuka masharti ya kimkataba.