ALICHO JIBU ELIAS MAGULI BAADA YA KUPIGIWA SIMU NA NYOSSO

 

Stori: CHAMPIONI

Beki mkongwe wa Mbeya City, Juma Said Nyosso, amekubali kuwa kitendo alichomfanyia mshambuliaji wa Simba, Elias Maguri na kuonyesha na gazeti la Championi si sahihi, si cha kiungwana na anajuta kupita kiasi.

Kutokana na maumivu ya moyo anayoyapata kutokana na kushiriki katika kitendo hicho, Nyosso amefanya mambo mawili, kwanza ni kumpigia simu Maguri na pili kupiga katika ofisi za gazeti hili.

Nyosso amesema alianza kupiga simu kwa Maguri na kumuomba radhi akimueleza namna anavyojisikia vibaya kutokana na kitendo hicho alichoona si sahihi.

Gazeti la Championi linaloongoza kwa michezo nchini, lilichapisha picha zile zilizoonyesha Nyosso akimtendea vitendo hivyo visivyo vya kiungwana wakati Simba

Akizungumza na Championi Jumatano, Nyosso ambaye ni beki wa zamani wa Simba, alisema kuwa kwa sasa hana tena amani kutokana na kitendo hicho alichomfanyia Maguri na amekuwa akitumia muda mwingi kujikosoa mwenye bila  kupata ufumbuzi wa tatizo hilo.

 “Pamoja na hali hiyo nawaomba viongozi wangu wa Mbeya City na wadau wa soka hapa nchini na duniani kote wanisamehe juu hilo, hakika halikuwa kusudio langu kumdhalilisha Maguri.

“Nikiwa kama binadamu wengine kusema kweli najisikia vibaya na ndiyo maana nimechukua uamuzi huu ambao binafsi nauona kuwa ni wa busara kwa kumtafuta Maguri ili kumuomba radhi kwa kitendo hicho nilichomfanyia.

“Nimetafuta namba yake, halafu nimejitahidi kumpigia simu yake ya mkononi na kuzungumza naye kwa takribani dakika mbili hivi. Lakini hakuonyesha dalili zozote za kunielewa nilichokuwa nikimwambia.

 “Kutokana na hali hiyo imebidi nitumiea njia hii ya kuzungumza na Championi ili kumwomba msamaha yeye pamoja na viongozi klabu yake ya Simba na klabu yangu Mbeya City, wanisamehe kwa kitendo kile.

“Kusema kweli nimejifunza na sitorudia tena kufanya kitendo kama hicho kwa mchezaji yoyote yule kwani hivi sasa najutia na ninajiona mkosefu mbele ya jamii. Nimefanya kosa hivyo nahitaji kusamehewa,” alisema Nyosso.

Gazeti hili lilifanya kazi ya kumtafuta Maguri ili kujua kama kweli aliwasiliana na Nyosso na alikubali ombi la kumsamehe.

 “Sijaongea naye na wala sihitaji kuzungumza naye kwa sababu kitendo alichonifanyia kimenidhalilisha mbele ya ndugu zangu, rafiki zangu pamoja na jamii yangu kwa ujumla.

“Kuna mtu alipingia simu sijui kama alikuwa ni yeye akitaka nimsamehe, lakini nilimkatalia kwani wakati alikuwa akifanya hivyo hakujua kama alikuwa ananidhalilisha?” alihoji Maguri.

“Kama kuna hatua za kuchukuliwa basi atachukuliwa ili liwe fundisho kwa wachezaji wengine wenye tabia kama za kwake ila kusema kweli kwa sasa siwezi kufanya hivyo,” alisema Maguri ambaye amejiunga na Simba msimu huu akitokea Ruvu Shooting.

Nyosso amekuwa mmoja wa wachezaji wa kwanza kuomba radhi baada ya kugundua kosa lake. Lakini Maguri ameshikilia msimamo kutokana na kuumizwa na jambo hilo.