STEPHEN KESHI KUTUA AZAM FC

Na, Richard Bakana, Dar Es Salaam

Baada ya kumfungashia vilango vyake aliyekuwa kocha mkuu wa klabu ya Azama FC, Mcameroon, Joseph Omog, Sasa wanalambalamba hao wapo kwenye mpango wa kumpatia mikoba hiyo Stephen Keshi aliyekuwa kocha wa Timu ya Taifa ya Nigeria.

Akizungumza  na Shaffihdauda.com Katibu mkuu wa Mabingwa hao watetezi wa ligi kuu ya Tanzania bara, Idrissa Nasoro, Amesema kuwa wapo kwenye mazungumzo na Keshi, ikiwezekana kuchukua nafasi ya Omog aliyetundikiwa daruga wiki hii.

“Tunatafuta kocha wa kusaidiana na George Best Nsimbe, Stephen Keshi tunawasiliana naye vizuri tu, lakini sio kwamba ndio atakuwa kocha wetu, bado tunaendelea kutafuta kocha atakae tufaa, Hapo badaye tutaweka wazi” Amesema Idrissa Nasorro.

Juzi uongozi wa klabu ya Azam FC, ulitangaza kuachana na kocha wake mkuu, Joseph Omog ambaye ameweka historia ya kuwa kocha wa kwanza kuipatia timu hiyo kikombe cha Ligi kuu ya Vodacom Tanzania Bara, ikiwa ni siku  moja tu, baada ya kutua nchini wakitokea Sudan, kucheza na El Marreikh na kutolewa kwenye michuano ya klabu Bingwa kwa jumla ya Mabao 3-2.

Katika Mkataba wa Joseph Omog na Azam FC kulikuwa na kipengere kilichokuwa kinasema kuwa, Omog lazima ahakikishe anaifikisha timu hiyo katika hatua ya Makundi ya michuano ya Klabu Bingwa zaidi ya hapo atakuwa amejivunjia Mkataba wake.