KIBADENI ARUDI SIMBA SC

Kocha mkongwe nchini, Abdallah Kibadeni Mputa, ameanza kazi rasmi katika klabu hiyo katika nafasi yake ya umakamu mwenyekiti wa kamati ya ufundi aliyoteuliwa.

Mwishoni mwa mwaka jana, Rais wa Simba, Evans Aveva, alitangaza kamati mpya za klabu hiyo, akiwemo kocha wa zamani, King Kibadeni, ambaye amepachikwa katika benchi la ufundi.

Kibadeni amefunguka kuwa, tayari ameshaanza kuitumikia timu hiyo kwa kukutana na viongozi wa Simba kwa kupanga mikakati mbalimbali kupitia mikutano, ikiwa na lengo la kuisaidia Simba.

“Tayari tumeshakaa vikao viwili na viongozi wa Simba lakini bado tunaangalia mechi zaidi, hivyo tutakutana tena na kamati ya utendaji kwa lengo la kushauriana na kuona tunafanya nini kuisaidia timu yetu.

“Lengo letu ni kuona timu inafanya vyema kwa kuhakikisha wote tunakuwa kitu kimoja kwa ajili ya kuisaidia timu,” alisema Kibadeni.