BAADA YA KUFUNGWA JIONI YA LEO AZAM FC ITARUDI KESHO

MABINGWA wa ligi kuu Tanzania bara, Azam fc wamemaliza ziara yao nchini Congo DR ambako wameshiriki michuano ya Mazembe inayoendelea mjini Lubumbashi.

Azam walianza kwa kufungwa goli 1-0 na TP Mazembe, wakatoka sare ya 2-2 na Zesco United ya Zambia na leo wamefungwa 1-0 na Don Bosco.

Katibu Mkuu wa Azam fc, Idrissa Nassor ‘Father’ amesema kikosi cha Azam kitatua kesho jijini Dar es salaam tayari kwa maandalizi ya mechi ya ligi kuu Tanzania bara dhidi ya Polisi Morogoro itayopigwa uwanja wa Jamhuri mwishoni mwa wiki hii.

“Tutarudi kesho saa mbili asubuhi, tutarudi Chamazi na kuendelea na mazoezi kuelekea mechi ya jumamosi Morogoro dhidi ya Polisi Morogoro. Baada ya hapo tutacheza na Mtibwa Sugar”. Amesema ‘Father’ na kusisitiza: “Mazoezi ya Congo yalikuwa maalumu kwa mechi za ligi ya mabingwa, tumejifunza mengi na tunatarajia kufanya vizuri”.